Çак кунсенче Шупашкарти 37-мĕш шкулта  тинĕспе çар флочĕн   енĕпе   республикăри ăмăрту пулса иртрĕ.   Çак конкурса  Çăкалăхри тĕп шкул   икĕ команда тăратрĕ.  Кашни ушкăнра виçшер ача тупăшрĕ. Ачасене тупăшăва  А.И.Кошелев  вĕрентекен  хатĕрлерĕ.

     Командăсен пултарулăхне пилĕк тĕрлĕ тупăшу витĕр тухса тĕрĕслерĕç. ОЗКа тăхăнса хывасси, автомата сÿтсе пуçтарасси,  тĕвĕсем çыхасси, ялав семафорĕпе  паллăсем  парасси тата çăмăл çăмхана инçете персе  ывăтассипе тупăшрĕç.  Хĕрÿ тупăшу витĕр тухса  вăтам ушкăн 21 команда хушшинче 6-мĕш вырăна тивĕçрĕ. Кĕçĕннисен ушкăнĕ 10 команда хушшинче 2-мĕш вырăна тухма пултарчĕ.   Тĕрлĕ тупăшура палăрнă ачасене  медальсемпе  чысларĕç.    А.Иванов çăмăл çăмхана инçе ывăтассипе, Г.Федорова ялав семафорĕпе паллăсем парассипе   çĕнтерÿçĕ ята тивĕçрĕç.    Иккĕшне те  «Чăваш  Енри  юнга» медальпе чысларĕç.  Командăсенчи ытти ачасем те çитĕнÿпе савăнтарчĕç.   Ялав семафорĕпе паллăсем парассипе С.Шмелева, Л.Артемьева 2-мĕш, Н.Артемьева - 3-мĕш  вырăнсене йышăнчĕç.  Малти вырăна йышăннă ачасене  тата  командăна дипломсемпе чысларĕç.

                                                                Ю. Кошелева, вĕрентекен.