Чӳк уйӑхӗн 20-мӗшӗнче Йӗпреҫ округӗнчи «Пограничниксен пӗрлӗхӗ» ушкӑнри ветеран пограничниксем Ҫӑкалӑх шкулне черетлӗ тӗлпулӑва килчӗҫ. Вӗсемпе пӗрле пирӗн шкулта вӗреннӗ, Украинӑра ҫар тивӗҫне пурнӑҫлакан ентешӗмӗр Галкин Николай Федорович та ҫитрӗ.
      Малтанах пограничниксен ушкӑнӗ Раҫҫей Геройӗ Л.С. Константинов ячӗпе хисепленсе тӑракан музейра пулчӗҫ, унти паха материалсемпе паллашрӗҫ.
      Ун хыҫҫӑн тӗлпулу саманчӗ пуҫланчӗ. Шкул директорӗ Александр Иванович Кошелев килнӗ хӑнасене тав турӗ. Вӗсем шкул пурнӑҫӗпе кӑсӑклансах тӑнине, вӗренекенсене хавхалантарса пынине
палӑртрӗ.
     Малалла «Пограничниксен пӗрлӗхӗн» ертӳҫи Шашкин Николай Юрьевич сӑмах илчӗ. Пӗлӳ ҫурчӗ ҫамрӑк ӑрӑва патриотла воспитани панине палӑртса хӑварчӗ. Шкулти «Ҫамрӑк пограничниксем» ушкӑн «Зарница» вӑййисенче, республика шайӗнчи ӑмӑртусенче, ҫарпа патриот вӑййисенче ялан тенӗ пек ҫӗнтерӳҫӗсен йышӗнче пулнине палӑртрӗ. Вӑл ачасене тӑрӑшса вӗренме, спортпа туслӑ пулма, шкул ятне малашне те ҫӳллӗ шайра тытма сунчӗ.
      Яланхи пекех хӑнасем хальхинче те пушӑлла килмен. Шкула Раҫҫей Федерацийӗн тата пограничниксен ялавне парнелерӗҫ. Пограничниксен пӗрлӗхӗ ячӗпе «Ҫамрӑк пограничниксен» ушкӑнӗн командирне Аня Артемьевана тата Вадим Алексеева асӑнмалӑх пограничниксен куркине парнелерӗҫ, малалла та хастар пулма сунчӗҫ.
        Галкин Николай Федорович та хӑйӗн калаҫӑвӗнче ачасен тӑрӑшса вӗренмеллине, спортпа туслӑ пулмаллине палӑртрӗ. Кашни вӗренекене ҫывхарса килекен Ҫӗнӗ ҫул ячӗпе пылак кучченеҫ парса саламларӗ.
       Шкул ачисем умӗнче Алексеев Алексей Николаевич, Захаров Юрий Вениаминович, Криушин Иван Петрович тухса калаҫрӗҫ. Вӗсем ачасене хӑйсен вӗренӗвӗ, ӗҫӗ-хӗлӗ пирки каласа
пачӗҫ. Вӗренекенсем хӑйсене кӑсӑклантаракан чылай ыйту ҫине хуравсем илчӗҫ. 
      Тӗлпулӑва килнисене Надежда Валерьевна Исакова вӗрентекен тав сӑмахӗ каларӗ. Вӑл шкул ачисем салтаксем патне ҫырусем ҫырнине, Ҫӗнӗ ҫул ячӗпе салам открыткисем хатӗрленине палӑртрӗ.           Юлашкинчен пурте пӗрле сӑн ӳкерӗнчӗҫ. Тӗлпулупа пурте кӑмӑлла юлчӗҫ.

                                                                                                                                  Ю.В. Кошелева, вӗрентекен